Otto Berg

Otto Berg
Statsborgarskap	Noreg
Fødd	24. august 1906 Bolsøy kommune
Død	10. april 1991 (84 år) Bærum kommune
Idrett	friidrett
Tok del i	Sommar-OL 1936, EM i friidrett 1934
Utmerkingar	Egebergs Ærespris

Otto Berg (24. august 1906–10. april 1991) var ein norsk friidrettsutøvar, turnar og politimann frå Bolsøy i Romsdal. Berg tok sølv i lengdehopp under EM i friidrett 1934 i Torino med 7,31 m. Han var etter tur medlem av klubbane Molde FIL, Torshaug IF og Oslo Politis IL.

Aktiv

Berg var son til gardbrukarar i Bolsøy. Sjølv utdanna han seg i den norske hovudstaden til politimann. Han vart norsk meister i lengdehopp i 1931 og i åra 1934-36, samt på 100 meter i 1935. Han tok elles ei rekke medaljar i hopp utan tilløp, stavhopp og tresteghopp.

Bergs personlege rekord i lengdehopp på 7,53 m sette han i august 1934 på Bislett stadion i ein landskamp mellom Noreg og Sverige. Hoppet var både norsk og nordisk rekord, ein rekord som svensken Erik Svensson, med tilnamnet Spänstfenomenet, tangerte seinare i tevlinga. For å kåre ein vinnar måtte det omhopping til, ei omhopping som Berg vann. Same året vart han tildelt Egebergs Ærespris for sine prestasjonar i friidrett og turn.

I 1935 flytta Berg den norske rekorden til Per Oscar Andersen i lengde uten tilløp med 11 cm til 3,445 m under noregsmeisterskapen, og seinare same året til 3,47 m. Den rekorden vart ståande i 21 år. For rekordhoppet mottok han kongepokalen. Også året etter vart Berg tildelt kongepokalen, men då for eit lengdehopp på 7,40 m.

Berg var norsk flaggberar ved Sommar-OL 1936 i Berlin. Under dei same leikane kom han på tiandeplass i lengde med eit hopp på 7,30 m. USA-amerikanaren Jesse Owens vann tevlinga etter å ha landa på 8,06 m.

Medaljar i norske meisterskap

• 1927: Sølvmedalje i tresteghopp – 14,31 m
• 1930: Sølvmedalje i lengdehopp – 7,09 m, og bronsemedalje i stavhopp – 3,50 m
• 1931: Gullmedalje i lengdehopp – 7,16 m
• 1932: Sølvmedalje i lengdehopp – 6,90 m
• 1933: Sølvmedalje i lengdehopp – 7,03 m
• 1934: Gullmedalje i lengdehopp – 7,32 m
• 1935: Gulllmedaljar på 100 meter – 10,9 sekundar, og i lengdehopp – 7,27 m
• 1936: Gullmedalje i lengdehopp – 7,40 m

Berg var busett i Bærum i Akershus.

Kjelder

• Magnus Breili: Sport i navn & tall. 1971